Мұнайшылар әулеттері – Ембі мақтанышы
Еңбек әулеттері кәсіпорындағы сабақтастықтың негізі болып
табылады. Бүгінде «Ембімұнайгаз» АҚ-да жиырмадан астам отбасы әулетінің
өкілдері еңбек етуде,
оларда үш және одан да көп ұрпақ өз өмірін күрделі
мұнайшы мамандығымен байланыстырды.
Олардың қатарында Жылқышиевтер, Құрманқұловтар, Төрехановтар, Салиевтер, Құлбалиевтер, Бекмурзиевтер, Оңдашевтар, Бешімовтер, Көрпебаевтар, Уәлиевтер, Бисенбаевтар, Жақашевтар, Райымбергеновтер, Балғымбаевтар, Бажбеновтар және т.б. әулеттер бар.
Бұлардан басқа ата-бабаларының Ембіде өткен еңбек жолын жалғастырған тағы да 50 шақты отбасы бар. Мұнайшы әулеттерінің Ембі өндірісінің дамуына қосқан еңбектерінің арқасында ұрпақтар сабақтастығы қалыптасып, мол тәжірибе ұрпақтан ұрпаққа жалғасуда, жастар арасында мұнайшы мамандығына мақтаныш сезім тәрбиеленуде.
Бешімовтердің мұнайшылық кәсіпке ден қоюы 1926 жылдан бастау алады. Аталары бақташы Бешім Қызылбасов – Жылыой жерінен алғаш мұнай тапқан адам. Кейіннен Қосшағыл, Төлес мұнай кеніштерінің ашылуына араласқан. Елбасының бастамасымен ұйымдастырылған «Мерейлі отбасы» республикалық сайысында Бешімовтер әулеті Атырау облысының атынан қатысып, Президенттің қолынан автокөліктің кілтіне ие болды.
Бешімовтер әулеті
Мұнайшы Ақтөрешовтер әулетінің тарихы Ленин, «Еңбек
Қызыл Ту», «Құрмет белгісі» ордендерінің иегері, атақты
бұрғышы-стахановшы
Ақтөреш Аталықұлының еңбек жолынан басталады. Ол Қарашүңгіл, Доссор,
Ескене, Терең-Өзек, Жантай, Оңтүстік Қамыскөл, Тақырбұлақ мұнай кен
алаңдарын игеруге атсалысқан. Бүгінде байырғы мұнайшының еңбек жолын
ұрпақтары жалғастырып, Жылыой өңірінде еңбек
етуде.
Ақтөрешовтер әулеті
Доссор өңірінде мұнайшы мамандығын мирас еткен
әулеттің бірі – доссорлық Салиевтер отбасы. Олар Атырау облысы бойынша
ұйымдастырылған «Мерейлі отбасы» байқауына қатысып, «Тату отбасы»
номинациясын жеңіп алған. Салиевтер әулетінің ортақ еңбек өтілі 247
жылды құрайды.
Салиевтер әулеті
Мұнайшы Хәкім Бәжбенов 1891 жылы Орал уезінің (қазіргі Атырау облысының Қызылқоға ауданы) Сарыкөл мекенінде дүниеге келген.
Еліміздің мұнай-газ саласының тарихында алтын әріптермен жазылып қалған 1911 жылғы 29 сәуірдегі №3 ұңғымадан атқылаған мұнай бұрқағының куәгерлерінің бірі. Байырғы мұнайшының ұрпақтары бүгінде еліміздің мұнай-газ секторында еңбек етуде.
Бәжбеновтер әулеті
Өткен ғасырда Ембі өндірісінде алғаш рет айналмалы
бұрғылау әдісін енгізген бұрғышы Үсен қарттан тараған Қанатбаевтар
мұнайшы әулеттерінің төрт буынының ортақ еңбек өтілі 276 жылды
құрап отыр. Қанатбаевтар отбасы Атырау облысы бойынша «Мерейлі отбасы»
байқауының Бас жүлдесін жеңіп алып, республикалық байқауға жолдама алды.
Қанатбаевтар әулеті
Доссор өңірінде еңбек етіп жатқан
мұнайшы әулеттерінің бірі – Жылқышиевтер отбасы. Олардың жалпы еңбек
өтілі 211
жылды құрап отыр. Жылқышиевтер отбасы Мақат ауданы бойынша «Мерейлі
отбасы» байқауына қатысып, «Парасатты отбасы» номинациясын жеңіп алды.
Жылқышиевтер әулеті
Мұнайшы әулеті Көшмағамбетовтер отбасының жалпы еңбек
өтілі 218 жылды құрайды. Көшмағамбетовтер әулеті Ембі өндірісінің
дамуына үлкен үлес қосқан. Мұнайшы әулетінің ұрпақтары бүгінде
«Қайнармұнайгаз» мұнай-газ өндіру басқармасында табысты еңбек етуде.
Көшмағамбетовтер әулеті
